ANSA UK

– Ikkje urettferdig

Trass i høge skulepengar, føler ikkje Ann-Karin Gjerde seg forskjellsbehandla i forhold til studentar frå EU-land.

Ann Karin Gjerde starta i haust på sitt andre år ved University of Essex, der ho tek ein fireårig bachelor i Business Management with a Modern Language.

Kvart år må 22-åringen punge ut med 9750 pund i skulepengar. Sjølv om medstudentar frå EU-land ”slepp unna” med å betale 3500 pund, føler ho seg ikkje forskjellsbehandla. 

– Foreldra mine betaler skatt til Noreg, og Noreg er ikkje med i EU. Studentar frå EU-land har foreldre som må betale skatt til EU-land, og det er derfor dei betalar mindre enn det til dømes eg gjer, slår ho fast.

Etter fire år ved University of Essex, sit Ann-Karin igjen med eit lån på om lag 360 000 kroner. Ho meiner grada ho tek er verdt kvar krone.

– På enkelte norske skular, som til dømes på BI, må ein også betale forholdsvis høge skulepengar, seier ho og legg til:

– Det er ingen universitet i Noreg som kan tilby den fagkombinasjonen eg får ved University of Essex. Levekostnadane i England er dessutan lågare enn dei til dømes hadde vore i byar som Oslo eller Bergen.

 

Tekst: Ingrid Endresen Thorseth

Dyrt i Storbritannia

 Problematikken med høge skulepengar for norske studentar, er noko Lånekassa er fullt klar over. Sjølv om Noreg er med i EØS, må norske studentar betale mellom 8000 og 12 000 pund i skulepengar kvart år. For studentar frå EU-land er prislappen vesentleg lågare: dei betalar berre mellom 3000 og 4000 pund i året.

– Dette skiljet mellom EU- og EØS-studentar gjelder først og fremst i Storbritannia og Irland. I Irland har dei offentlege lærestadane vorte litt mildare på dette området. Likevel er det fleire krav som EØS-studentar må fylle for å betale same beløp som studentar frå EU-land, fortel informasjonskonsulent i Lånekassa, Christin Dammen, og legg til:

– Studentar frå mellom anna Liechtenstein og Island må også betale dei høge skulepengane, av same grunn som studentar i Noreg.

Yngrebølgje. Dei neste åra er det spådd ei yngrebølgje, og stadig fleire vel å ta delar av utdanninga si i utlandet. For nordmenn er Storbritannia det mest populære landet å studere i, og i skuleåret 2009-2010 valte 3457 nordmenn å studere der.

Dammen trur likevel ikkje høge skulepengar er eit hinder for norske studentar.

– På dei aller fleste lærestadane i Storbritannia må ein betale om lag 100 000 norske kroner i året i skulepengar. Sjølv om mesteparten av Lånekassa si skulepengestøtte er lån, er det mogleg for dei aller fleste å finansiere heile utdanninga si gjennom støtte frå oss, seier Christin Dammen.

 

Tekst: Ingrid Endresen Thorseth

 

Sist endret: 13.02.2012 18:04 Skriv ut